Buinesere a ducj
o sei contente di jessi culì e o ringrazi di cûr Carmen e l'aministrazion Comunâl par l!invît .
Cjatâmi chi usgnot al è regâl grant, Ancjemò graziis.
Al è vêr ce che dîs Elisa, Osôf al è la mê scune,mai dismenteade.
Plui o voi indenant cui agns e plui i ricuarts si fasin prepotents, mi ricuardi parfin i odôrs (chel dal vuardi e dal forment intal cjast di Cjule, chel di ue strucjade intai turclis di siore Lussie che di tiere apene vierte intal cjamp) e i puescj (il puarton dai Frics, la strete di Menelic, la beorcje, l'ancone de Madone dal borc Daûr) Ma o ai ferme intal cûr dute la int.
Agne Cute, Ansule dal Cit, Menine Meneace, Cute Cjastuart, 'Site di Cau, Vire di Rel, Gjovane la Bandarie, Rosalie di Bero, Costance Cjapelar, Anute Cjapelar, Min di Cau, Dele Polente, Udilie Stangje….
e i canais, i salvadis dal borc daûr, Licia, Sergio, Dado, Pigi, gno fradi Renso, Luigina, Marilena, Silva, Gilberto, Giampietro , un trop di mostricjos, usâts a fâ dispiets.
Dispiets,che viodûts di culì, a somein pluitost zûcs che malefatis.
Chest mont colorât e lusoros mi à judât a cressi, e se la vite mi molave un pataf, la profonditât des mes lidrîs a lu sfantave, la sagjece des peraulis dai vielis a lu smamive. Jessi nassude in chel puest, cun che int, in chei timps mi à regalât la bielece dai siums.
O ai cirût di meti dentri des contis, alc di dut ches, scritis par me gnece e par ducj i fruts di ogni etât.
Graziis ancjemò.