IL ÇUS VENDRAM

Il çus Vendram al vîf dentri la stale di nono Masutin, aromai vueite, parcè che no si pues plui tignî nemâi se no tu sês un grant contadin, e il nono nol jere contadin, di mistîr al faseve il purcitâr.
Cussì, ben planc la stale e je deventade un puest pes creaturis cence cjase, un lûc cuiet e sigûr.
Passant dongje tu sintis sgripiaments di talpis, rumôrs, vuicadis, ridadis e cisicheçs, sunsûrs… jo o pensi al tant cefâ, al tant scombati par tirâ indenant di lôr, piçui abitants di chest mont.
Poben, Vendram al controle che lis robis no si uastin, cussì al à metût cualchi regule che ducj a scuegnin rispietâ.
"No si pues cjaçâ, fâ dispiets o maltratâ chei che no son compagns di te, bisugne puartâ rispiet ai vielis e viodi di lôr cuant che si inmalin."
Lis creaturis a ubidissin, ancje parcè se il çus a si invelegne…Diu nus vuardi!
In che volte che il Masurin Arturo al à cirût di cerçâ la surîs Ghessie, al è sucedût un mismàs:
Vendram scuasit a lu svuarbave, a i à vosât ben e no mâl, disint che al meretave di jessi metût in preson, di jessi slontanât par simpri dal puest, di contâ a dut il mont la sô tristerie, tant che Arturo, scuintiât, si è scuindût par un biel pieç dentri la grepie.
Fâ lâ d'acuardi tantis creaturis diferentis no è robe di pôc.
La famee dai sghirats e bruntule par vie che lis gjespis e àn fat il nît dongje la lôr tane:ur da fastidi il businament cence fin.
La surîs Ghessie, vedrane, cu la manie de pulizie, e je simpri in vore, a lustre la sô cjase, cjalant di neri il riç, che nol nete dispès.
E vorès tirâ ju lis telis di rai, ma une cjalade stuarte di Vendram la ferme, che no si pues sdrumâ la cjase di chei altris, e la tele e je la cjase dal rai.
Intal cjanton a çampe a gnaulin i piçui di Curiôs il gjat, lui al ven dispès a cjatâju , cui vôi plens di afiet ju conte e daspò al sbrisse vie cun arie braurose…al è content di viodiju cressi pulît.
Al è un mostricjo, nol degne di une cjalade la puare gjate Riche, mari dai siei fruts, che e sarès la sô femine, se lui nol ves chel brut vizi di plantâ fameis da pardut!
Gjudite la bilite e cuche pal balcon, si ferme un lamp a peteçâ cun Margarite, la surisute.
Ce tantis robis che si contin! Peteçs di feminis , peçots…e il zupet Polonio al sta daûr a femine dal so amî ,la furmie Mariutine e je montade in scagn, daspò che je stade a fâ la muse a regjine des furmies, la pavee Rosine e somee la parone dal mont, il crot Lisute al à scussât une talpe, il gjâl Checo al à masse morosis…e vie discorint, dismenteantsi dal timp che al passe e cjatant simpri gnûfs argoments.
Il çus Vendram al cjale, al sint, al scolte dut.
Dispès al vorès che lis creaturis a vessin un tic di sintiment di plui, a son canais dispietôts, cun tante premure di vivi.
Intal cjâf i zirin pensîrs :" Ce biel puest chest culì. O sin propit furtunâts a vêlu cjatât! Cheste tiere e je tant grande, o stin in tancj parsore e o vin il dirit di pescjâle,di doprâle, ma ancje il dovê di lassâle nete cemût che la vin cjatade. Salacor i oms a pensin che nô o sin in masse e che no coventìn a nuie.
Si, la fè, si pues dî che tantis creaturis a dan fastidi, ma ancje a nô ogni tant nus dan fastidi i oms.
Ma se o cirin di lâ d'acuardi, e al bastarès pôc, no saressial plui biel ? " Daspò al mene il cjâf, si leche lis plumis, al siere i vôi e dentri dai vôi serâts al viôt un mont plen di gjonde, cun aghis che a ridin, un cîl ricamât di sisilis e pojanis, e l'aiar galup che al ingredee lis niulis.
Alore al ringrazie il Signôr, disint ben planc" Viôt tu di nô" E i pâr propit che il Signôr al sedi alì cun lôr, che ju cjarine, sentât su la grepie.